Hamasi ka rënë dakord të lirojë të gjithë pengjet e mbetura izraelite, por thotë se dëshiron negociata të mëtejshme mbi një numër pikash kyçe të përcaktuara në planin e paqes të SHBA-së.
Në një deklaratë, lëvizja tha se ra dakord “të lirojë të gjithë të burgosurit izraelitë, si të gjallë ashtu edhe të vdekur, sipas formulës së shkëmbimit të përfshirë në propozimin e Presidentit Trump” – nëse plotësohen kushtet e duhura për shkëmbimet, raporton BBC.
Por duket se sugjeron se po kërkon negociata të mëtejshme për çështje të tjera që kanë të bëjnë me të ardhmen e Gazës dhe të drejtat e palestinezëve, duke thënë se ato janë ende duke u diskutuar.
Njoftimi erdhi disa orë pasi Presidenti i SHBA-së, Donald Trump, i dha Hamasit një afat të dielën për të pranuar planin e paqes ose do të përballej me “të gjithë ferrin”.
Deklarata e Hamasit nuk e përmend ose nuk e pranon konkretisht planin 20-pikësh të Trump, por thotë se “rinovon marrëveshjen e saj për t’ia dorëzuar administrimin e Rripit të Gazës një organi palestinez të pavarurish (teknokratësh), bazuar në konsensusin kombëtar palestinez dhe mbështetjen arabe dhe islamike”.
Megjithatë, deklarata nuk përmend një nga kërkesat kryesore të planit – që Hamasi të bjerë dakord për çarmatimin e tij dhe të mos luajë asnjë rol të mëtejshëm në qeverisjen e Gazës.
