Klubi basketbollistik Peja ka njoftuar se për ediconin 2025/2026 do të marrin pjesë në “ENBL League”.
ENBL (European North Basketball League) është një ligë ndërkombëtare basketbolli për klube meshkujsh nga vendet e Europës Veriore, Qendrore dhe Lindore.
Rreth dy vite më parë në këtë ligë kishte marrë pjesë edhe Sigal Prishtina, por kryeqytetasit ishin përjashtuar shkaku i grumbullimit të borxheve.
Njoftimi i plotë nga Peja:
E kemi kënaqësinë t’iu njoftojmë që ndeshjet Europiane do të kthehen në Karagaçi, pasi KB Peja do të jetë pjesëmarrëse në ENBL League për edicionin 2025/26.
Orari për edicionin e ri të ENBL do të publikohet pas mbledhjes së skuadrave pjesëmarrëse që mbahet me 18 Gusht.
Këtë edicion në ENBL do të jenë pjesëmarrëse 27 skuadra në një tabelë të vetme, ku secila skuadër do të luaj 8 ndeshje me 8 kundërshtar të ndryshëm (4 si vendas, 4 si mysafir). Nga 27 skuadra pjesëmarrëse në fazën grupore, 16 ecin tutje në fazën me eliminim direkt.
Klubet pjesëmarrëse do jenë nga Kosova, Britania e Madhe, Gjermania, Kroacia, Rumania, Greqia, Austria, Norvegjia, Bullgaria, Belgjika, Islanda, Çekia, Sllovakia, Holanda, Estonia, Polonia dhe Letonia.
Jemi shumë të lumtur dhe të motivuar që të konkurojmë me skuadrat më të mira Europiane, në një kompeticion të jashtëzakonshëm.
