Cristiano Ronaldo ka konfirmuar se nuk do të marrë pjesë në Kupën e Botës për Klube, duke i dhënë fund spekulimeve që e lidhnin me këtë turne të organizuar nga FIFA.
“Në thelb është pothuajse vendosur: nuk do të jem pjesë e Kupës së Botës për Klube”, deklaroi ylli portugez në një intervistë të fundit.
Ai pranoi se ka pasur kontakte dhe oferta të shumta për të marrë pjesë, por ka zgjedhur të mos angazhohet në këtë kompeticion.
“Pavarësisht ftesave dhe propozimeve të shumta që kam marrë, vendimi është pothuajse i marrë nga ana ime,” – u shpreh Ronaldo.
Sipas tij, një vendim i tillë është marrë pas një analize të kujdesshme mbi aspektin fizik dhe planifikimin afatgjatë:
“Nuk mund të jesh pjesë e çdo kompeticioni. Duhet të mendosh në afat të shkurtër, të mesëm dhe të gjatë. Ndaj, pavarësisht interesimit nga disa palë, është marrë vendimi për të mos qenë pjesë e këtij turneu.”
Kujtojmë që Ronaldo aktualisht është pjesë e Al Nassr në Arabinë Saudite dhe edhe pse ka mbetur një nga lojtarët më të kërkuar globalisht, duket se fokusi i tij është tashmë më shumë tek ruajtja e formës dhe karrierës sesa pjesëmarrja në çdo eveniment të madh.
