Kosova dhe Zvicra kanë shënuar thellimin e partneritetit të tyre përmes lansimit të Programit të Bashkëpunimit për periudhën 2026–2029, në një ngjarje të përbashkët të mbajtur në Prishtinë.
Në këtë aktivitet morën pjesë Ambasadori i Zvicrës në Kosovë, Jürg Sprecher, Drejtoresha e Përgjithshme e Agjencisë Zvicerane për Zhvillim dhe Bashkëpunim (SDC), Patricia Danzi, si dhe Kryeministri i Kosovës, Albin Kurti, të cilët ritheksuan marrëdhëniet e ngushta dhe miqësore ndërmjet dy vendeve.
Ambasadori Sprecher ka theksuar se mbështetja e Zvicrës ndaj Kosovës ka qenë e vazhdueshme dhe e përqendruar në zhvillimin e vendit dhe mirëqenien e qytetarëve, duke shtuar se programi i ri shënon një kalim drejt një partneriteti më strategjik.
Ndërkaq, Patricia Danzi është shprehur se programi është në përputhje me Strategjinë Kombëtare për Zhvillim të Kosovës dhe synon të krijojë ndikim real përmes investimeve dhe bashkëpunimit me institucionet dhe shoqërinë civile.
Kryeministri Albin Kurti ka falënderuar Zvicrën për mbështetjen e vazhdueshme, duke theksuar se ky shtet mbetet një nga partnerët kryesorë të Kosovës dhe një ndër investitorët më të mëdhenj të huaj.
Ai ka nënvizuar se bashkëpunimi me Zvicrën kontribuon drejtpërdrejt në rrugëtimin e Kosovës drejt integrimit në Bashkimin Evropian.
Programi i ri i bashkëpunimit parasheh një kontribut financiar prej rreth 70 milionë eurosh dhe fokusohet në tri fusha kryesore: qeverisja demokratike dhe paqja, zhvillimi ekonomik i qëndrueshëm dhe tranzicioni i gjelbër, si dhe zhvillimi i barabartë njerëzor.
Gjithashtu, do të vazhdojë bashkëpunimi edhe në fushën e migrimit.
Ky program pasqyron përkushtimin e përbashkët të Kosovës dhe Zvicrës për zhvillim të qëndrueshëm dhe përballje me sfidat e reja në vitet në vijim.
“Programi është zhvilluar përmes një qasjeje gjithëpërfshirëse, duke përfshirë Agjencinë Zvicerane për Zhvillim dhe Bashkëpunim (SDC), Divizionin për Paqe dhe të Drejtat e Njeriut në kuadër të Departamentit Federal për Punë të Jashtme (FDFA), Sekretariatin Shtetëror për Çështje Ekonomike (SECO) dhe Sekretariatin Shtetëror për Migrim (SEM)”, theksohet në fund të njoftimit./teve1.info/
