Zyra Kombëtare e Auditimit (ZKA) ka njoftuar se ka filluar auditimin e performancës mbi “Efektivitetin e shërbimit të ngrohjes qendrore” për periudhën 2023–2025.
Sipas ZKA-së, qëllimi i këtij auditimi është vlerësimi i menaxhimit të rrjetit të shpërndarjes së energjisë termike nga Ndërmarrja Publike “Termokos” për të garantuar furnizim të barabartë, matje të sakta dhe ngrohje të qëndrueshme për konsumatorët.
Po ashtu, auditimi synon identifikimin e mangësive që ndikojnë në cilësinë, besueshmërinë dhe koston e shërbimit publik të ngrohjes qendrore.
“Sistemi i ngrohjes qendrore në Prishtinë mbulon mbi 2.1 milionë metra katror hapësira banimi komerciale dhe institucionale. Në bazë të shqetësimeve të ngritura nga mediat dhe qytetarët rezulton se pavarësisht investimeve të realizuara sistemi i ngrohjes qendrore vazhdon të përballet me humbje të larta në rrjet dhe furnizim të pabarabartë të ngrohjes, duke u përcjellë me ankesa prej konsumatorëve si dhe duke ndikuar drejtpërdrejt në cilësinë dhe besueshmërinë e shërbimit publik të ngrohjes qendrore”, theksohet në njoftim.
