Deputeti i zgjedhur i Lidhjes Demokratike të Kosovës, Armend Zemaj, ka deklaruar se qëndrimi i partisë mbetet i pandryshuar sa i përket krijimit të institucioneve të reja, duke theksuar se përgjegjësia për konstituimin e tyre i takon shumicës parlamentare të udhëhequr nga Lëvizja Vetëvendosje.
Pas mbledhjes së Grupit Parlamentar të LDK-së, Zemaj tha se në takim pati transparencë të plotë, përveç çështjeve që kanë të bëjnë me diskutimet e brendshme të partisë.
“Nga ajo që keni dëgjuar, ishte një transparencë e plotë, përkundër atyre që janë çështje të diskutimeve të brendshme që i takojnë partive politike”, tha ai.
Duke folur për mundësinë e arritjes së një marrëveshjeje politike, Zemaj theksoi se synimi mbetet shmangia e zgjedhjeve të jashtëzakonshme, pasi sipas tij ato nuk janë në interes të qytetarëve.
“Po, qëllimi mbetet i njëjtë, arsyeja është e njëjtë. Evitimi i shkuarjes në zgjedhje të jashtëzakonshme nuk u konvenon qytetarëve të Republikës së Kosovës dhe barra e përgjegjësisë bie mbi Albin Kurtin, si shumicë parlamentare, për krijimin e institucioneve të reja”, u shpreh Zemaj.
I pyetur nëse pret ndonjë takim gjatë ditës së sotme, ai tha se nuk e beson një gjë të tillë, duke kujtuar se të nesërmen është thirrur seanca për konstituimin e Kuvendit.
“Nuk besoj, sepse nesër është thirrur seanca. Sot dita vetëm kalon. Nuk jemi në urgjencë, por jemi në limit të afatit kushtetues, pasi nesër duhet të konstituohet Kuvendi i ri i Republikës së Kosovës dhe më pas rrjedhin afatet kushtetuese për zgjedhjen e Qeverisë dhe të presidentit të ardhshëm”, tha ai.
Sa i përket takimit të zhvilluar një ditë më parë ndërmjet përfaqësuesve të LDK-së dhe Lëvizjes Vetëvendosje, Zemaj tha se qëndrimet e LDK-së tashmë janë bërë publike dhe se partia vazhdon të kërkojë një ndarje të balancuar të përgjegjësive në rast të një partneriteti qeverisës.
“Qëndrimet e LDK-së janë publike. Ndarja e pushtetit duhet të jetë e balancuar nëse dëshirohet të ketë partneritet funksional në interes të Republikës së Kosovës. Nëse ka qëllime personale dhe ambicie për mbajtjen e pozitave shtetërore duke i shërbyer një partie politike, atëherë Lidhja Demokratike e Kosovës nuk sheh ndonjë mundësi tjetër për të kontribuar, përveç votës demokratike që e ka në Kuvendin e Kosovës”, deklaroi Zemaj.
