Probleme të tjera janë paraqitur për yllin e ri, Lamine Yamal, në ditën kur i mbushi 18 vjet.
Futbollisti i Barcelonës festoi të shtunën, një ditë para se të bëhej 18-vjeçar.
Sipas mediave spanjolle, festa në një shtëpi në Olivella, ishte shfaqje e luksit, muzikës dhe ekskluzivitetit. Ishin rreth 200 të ftuar, përfshirë artistë ndërkombëtarë, figura të njohura të rrjeteve sociale dhe futbollsitë.
Festa ishte private dhe dihen pak detaje rreth asaj që ndodhi. Por disa prej të ftuarve kanë treguar për shfaqjet që ishin.
Kjo ka bërë që Shoqata e Personave me Akondroplazi dhe Displazi të Tjera Skeletore të denoncojë publikisht angazhimin e personave me trup të shkurtër në festën e organizuar nga futbollisti.
Organizata spanjolle bëri një deklaratë në platformën X.
“Shoqata denoncon punësimin e xhuxhëve si argëtim në festën e Lamine Yamal”, shkruan në deklaratë.
Janë paralajmëruar masa ligjore dhe sociale kundër futbollistit “për të mbrojtur dinjitetin e personave me aftësi të kufizuara, duke marrë parasysh se këto veprime shkelin jo vetëm ligjin, por edhe vlerat themelore etike të një shoqërie që synon të jetë e barabartë dhe e respektuar”.
Shoqata ka shkruar se është e papranueshme që në shekullin e 21-të “njerëzit me trup të shkurtër të përdoren si argëtim në festa private dhe është edhe më serioze kur këto veprime përfshijnë figura publike si Lamine Yamal. Dinjiteti dhe të drejtat e komunitetit tonë nuk janë argëtim për askënd, në asnjë rrethanë”.
