Ai tha se është e rëndësishme që Serbia të sillet “me seriozitet dhe me përgjegjësi”.
“Po flasim për ndryshime të mëdha tektonike politike. Pas 10 vjetësh serbët kanë marrë vendim që të largohen nga institucionet e Prishtinës”, ka thënë Vuçiq për Televizionin Pink.
Vuçiq ka thënë, po ashtu, se supozimet që serbët po veprojnë me urdhër të Beogradit, “janë të pakuptimta”.
Më 5 nëntor, Lista Serbe, partia më e madhe e serbëve të Kosovës, ka vendosur që të largohet nga të gjitha institucionet e Kosovës.
Paralajmërimet e Listës Serbe për largim nga institucionet e Kosovës kanë ardhur pas vendimit të autoriteteve të Kosovës për suspendimin e drejtorit të Policisë së Kosovës për rajonin e veriut, Nenad Gjuriq, i cili ka refuzuar që të zbatojë vendimin e Qeverisë së Kosovës për riregjistrimin e makinave që kanë targa të lëshuara nga Serbia në RKS – Republika e Kosovës.
Pas këtyre zhvillimeve edhe Qeveria e Kosovës ka mbajtur mbledhje të dielën.
Sipas komunikatës së Qeverisë, në këtë mbledhje kryeministri Kurti u shpreh se “ligjshmëria dhe kushtetutshmëria e Republikës nuk mund të komprometohen, ndërkaq që dialogu dhe institucionet nuk kanë alternativë. Ai përsëriti thirrjen që mos të bojkotohen ose braktisen institucionet e Kosovës, të cilat i shërbejnë çdonjërit pa dallim”./teve1.info/
