Ministrja e Drejtësisë, Albulena Haxhiu ka reaguar për vrasjen e gruas në Pejë, e cila u vra në mëngjesin e sotëm nga bashkëshorti i saj.
Haxhiu ka thënë se ky lajm për të është tronditëse dhe e patolerueshme.
“Në mëngjesin e sotëm edhe një grua u vra nga burri në Pejë, vetëm 4 ditë nga vrasja e një gruaje po ashtu nga burri në Ferizaj. Kjo është shumë e rëndë. Është tronditëse. Është dhimbje e madhe. Është e patolerueshme”, shkroi Haxhiu në Facebook.
Ajo tutje ka bërë të ditur që sot ka ftuar në takim ministrin e Punëve të Brendshme, kryesuesit e këshillave, u.d Kryeprokurorin dhe Drejtorin e Policisë së Kosovës.
“Nuk ka rrugë tjetër pos si institucione të Republikës së Kosovës të luftojmë pa kompromis këto fenomene. Pavarësisht përkushtimit, masave të ndërmarra, fushatave të iniciuara me qëllim pikërisht barazinë gjinore, vrasjet ndaj grave po vazhdojnë. Shpeshherë dhunuesit janë bërë vrasës pikërisht për shkak të mosndëshkimit adekuat nga institucionet përkatëse”, tha ministrja.
Ministrja po ashtu deklaroi se vrasjet e grave në Kosovë janë bërë fenomen që tejkalon çdo shqetësim, duke e përmendur që askush nuk është pronë e askujt.
“Vrasjet ndaj grave në Republikën e Kosovës janë bërë fenomen që tejkalon çdo shqetësim. Nuk mund të presim emancipimin e askujt derisa të bëhen të vetëdijshëm për barazinë mes burrit dhe gruas. Asnjë qytetar nuk është mbi dikë tjetër, askush nuk është pronë e askujt. Gruaja dhe burri janë të barabartë. Dhe si shtet nuk do të tolerojmë asnjë lloj dhune të burrit ndaj gruas”, tha Haxhiu./teve1.info/