Një aksident trafiku ka ndodhur rreth orës 18:00 në rrugën nacionale Mitrovicë–Zubin Potok, në segmentin rrugor në fshatin Zhabar, ku një veturë ka goditur një këmbësor të mitur.
Lajmin e ka konfirmuar zëdhënësi i Policisë për rajonin e Mitrovicës, Avni Zahiti, i cili ka bërë të ditur se i lënduari është dërguar për tretman mjekësor dhe se policia ka nisur hetimet për të sqaruar rrethanat e aksidentit.
“Në rrugën nacionale Mitrovicë- Zubin Potok, në segmentin rrugor në fshatin Zhabar, ka ndodhur një aksident trafiku ku një veturë ka goditur një këmbësor të mitur”- tha Zahiti.
Ndërkohë, nga Shërbimi Emergjent nga Spitali i Përgjithshëm i Mitrovicës “Dr.Sami Haxhibeqiri” është bërë e ditur se fëmija, ka marrë ndihmë mjekësore emergjente në ora 18:07.
“Pas i janë kryer ekzaminimet e nevojshme, Tomografia e Kompjuterizuar (CT e kokës), është referuar për në QKUK, tek specialistët e neurokirurgjisë. Për momentin është jashtë rrezikut për jetë, por në monitorim deri në përcjellje për QKUK”, thuhet në konfirmimin e tyre.
