Lëvizja Vetëvendosje përmes kryetarit të saj Albin Kurti, ka ngritur statusin e saj në Kongresin e Partisë së Socialistëve dhe Demokratëve Evropianë (PES) në Amsterdam, duke u bërë parti e asociuar në këtë organizatë.
Në njoftimin e kësaj partie thuhet se ky është niveli më i lartë që një parti mund të arrijë në një familje politike evropiane para se shteti të bëhet anëtar në Bashkimin Evropian.
Kurti, i shoqëruar nga Sekretari Organizativ Alim Rama dhe anëtarja e Kryesisë Tinka Kurti, falënderoi pjesëmarrësit e kongresit dhe theksoi angazhimin e Kosovës për demokraci, drejtësi dhe integrim evropian.
Në fjalimin e tij, kryeministri në detyrë theksoi sfidat e përballuara nga Kosova, duke përmendur përfundimin e konstituimit të Kuvendit më 10 tetor, rezultatet pozitive nga zgjedhjet lokale të 12 tetorit dhe nevojën për heqjen e masave penguese ndaj vendit.
Ai gjithashtu theksoi përpjekjet e qeverisë për qeverisje të mirë, zhvillim ekonomik dhe social, dhe për të siguruar bashkëjetesë paqësore mes komuniteteve në Kosovë.
