Dy laura digjitale u përuruan mesditën e së premtes.
Nga tani e tutje në udhëkryqin në hyrje të stacionit hekurudhor të Pejës dhe në kryqëzim të rrugës së transitit janë futur në funksion këto laura për të ulur rrezikun në komunikacionin hekurudhor dhe rrugor.
Në përurimin e tyre, kryeshefi ekzekutiv i Infrakosit, Naser Krasniqi, u shpreh se riski i rrezikut në këto dy udhëkryqe ishte i lartë.
“Kanë përfunduar edhe testet finale të dy vendkalimeve që kemi vendosur në ura në Pejë, në këtë udhëkryq që jemi dhe në tranzit e njohur për Pejë. Pa dyshim që do të kontriboj në rritjen e sigurisë dhe pjesëmarrësve në trafikun hekurudhor dhe rrugor…. Të dy vendkalimet kanë qenë jashtëzakonisht të frekuentuara me një risk jashtëzakonisht të lartë të aksidenteve që ne mendojmë se do të zvogëlohet rreziku i aksidenteve në një masë jashtëzakonisht dukshëm te madhe”, tha Krasniqi.
E Berat Ganiqi, këshilltar politik i Ministrit në Ministrinë e Infrastrukturës, u shpreh se në plan kanë edhe vendosjen e 21 laurave anë e mbanë Kosovës.
“…për 21 laura të tjera do të shikojmë mënyrën e financimit. Do të shikojmë që fondet e Bashkimit Evropian dhe fondet nga Bankat Botërore, që mendojmë të hyjmë në kredi dhe t’i vendosim, për shkak se dihet fatkeqësisht ka pasur fatkeqësi në vitet e fundit për shkak të mungesës së sinjalizimeve të laurave”, deklaroi Ganiqi.
Se si funksionojnë këto laura, për Tëvë1 e shpjegoi, Xhavit Fejza, menaxher i këtij projekti dhe shef i shërbimit të sinjalizimit.
“Këto vendkalime që janë lëshuar sot në funksion, funksionojnë në mënyrë automatike. Do të thotë çdo gjë shkon, janë të lidha të gjitha në një sistem. Njësia qëndrore ku janë të lidhura është kjo. Dhe përshembull ju e patë qysh funksionoj mënyra e punës të këti mbikalimi. Treni e shkel senzorin atje dhe aktivizohen këtu drita dhe zilja. Për 15 sekonda fillon me ra bariera dhe mbyllet nënkalimi sigurohet. Pastaj kur kalon treni në mënyrë automatike gritet bariera dhe përfundo cikli i sigurimit të nënkalimit”, deklaroi Fejza.
Kryeshefi ekzekutiv i Infrakosit gjithashtu u bëri thirrje qytetarëve që të jenë të kujdesshëm që të mos i dëmtojnë dhe thyejnë laurat.
