Mbrojtësi i Francës, Raphael Varane nuk do të jetë pjesë e Manchester Unitedit pas përfundimit të edicionit aktual.
Varane e ka konfirmuar largimin e tij nga ekipi anglez të martën, gjë që është bërë zyrtare edhe në faqen zyrtare të Manchesterit.
Ai do të largohet në verë si lojtar i lirë pasi i skadon kontrata me klubin, pjesë e të cilit ishte prej verës së vitit 2021. Varane këtë edicion ka shënuar një gol në 30 paraqitje në të gjitha garat, ndërsa Unitedi e ka falënderuar për kontributin e tij dhe i ka dëshiruar suksese në të ardhmen.
31-vjeçari gjatë tri sezoneve në “Old Trafford” e ka fituar Kupën e Ligës me fanellën e Manchester Unitedit, ndërsa në Premier League ka regjistruar 67 paraqitje në total. Para se t’i bashkohej ekipit anglez, Varane karrierë ka bërë edhe te Real Madridi e Lensi.
Varane nëpërmjet një video-mesazhi ka falënderuar klubin dhe tifozët për përkrahjen gjatë këtyre viteve dhe ka shtuar se shpreson ta ndihmoj ekipin për ta mbyllur këtë edicion me një trofe para se të largohet. Më 25 maj, Manchester Unitedi do të përballet me Manchester Cityn në finalen e Kupës FA.
