Sulmuesi i Kombëtares së Kosovës, Albion Rrahmani e shënoi golin e parë për ekipin e tij në sezonin 2025/26.
Të dielën, Rrahmani startoi te Sparta e Pragës dhe shënoi gol në minutën e 22-të, duke kontribuar në fitoren 3:2 ndaj Mlada Boleslav, në kuadër të xhiros së dytë të kampionatit të Çekisë.
24-vjeçari u zëvendësua në fillim të pjesës së dytë, ndërsa trajneri i Spartës, Brian Priske, ka lavdëruar Rrahmanin.
“Jam i kënaqur që kemi kualitet në gjithë lojtarët. Më duhet ta lavdëroj Albion Rrahmanin, që ka pasur lojë shumë të mirë. Ai ishte i përfshirë në presing, shënoi gol të rëndësishëm”, ka thënë Priske.
Rrahmani verën e shkuar u transferua te Sparta nga Dinamo Bukureshti dhe në sezonin e tij të parë në Çeki pati telashe të mëdha për të gjetur formën, ndërsa në këtë sezon ka startuar furishëm.
Pjesë e Spartës së Pragës është edhe futbollisti tjetër i Kosovës, Ermal Krasniqi, i cili nuk u aktivizua ndaj Mlada Boleslavit.
