Të paktën 103 persona u vranë gjatë natës dhe deri të dielën nga sulmet izraelite në Rripin e Gazës, sipas të dhënave nga spitalet dhe mjekët në territorin e rrethuar.
Kjo vjen ndërsa Izraeli intensifikon luftën që ka hyrë në muajin e 20-të, pa shenja zbutjeje.
Në qytetin jugor Khan Younis, mbi 48 persona u vranë nga sulmet ajrore, përfshirë sulme ndaj shtëpive dhe tendave që strehojnë njerëz të zhvendosur. Mes viktimave ishin 18 fëmijë dhe 13 gra, njoftoi Spitali Nasser.
Në veri të Gazës, dy sulme në kampin e refugjatëve në Jabaliya morën jetën e 19 personave. Një nga sulmet vrau nëntë anëtarë të një familjeje të vetme, ndërsa tjetri shkaktoi vdekjen e 10 personave, përfshirë shtatë fëmijë dhe një grua, sipas burimeve të emergjencës atje.
Ushtria izraelite nuk ka komentuar ende mbi këto sulme, raporton AP.
Në ndërkohë, Izraeli ka nisur një ofensivë të re me emrin “Qerret e Gideonit”, me qëllim pushtimin e më shumë territorit në Gaza, zhvendosjen e qindra mijëra palestinezëve drejt jugut dhe forcimin e kontrollit mbi shpërndarjen e ndihmave humanitare.
Sipas qeverisë izraelite, qëllimi është të shtohet presioni ndaj Hamasit që të pranojë një armëpushim të përkohshëm sipas kushteve të Izraelit, i cili do të përfshinte lirimin e pengjeve izraelite, por nuk do të shënonte përfundimin e luftës.
Hamasi, nga ana tjetër, kërkon një tërheqje të plotë të forcave izraelite dhe një marrëveshje që do t’i jepte fund konfliktit në tërësi.
Ofensiva nisi pas përfundimit të vizitës së presidentit amerikan Donald Trump në rajon – një vizitë që nuk përfshiu ndalesë në Izrael.
Negociatat për një marrëveshje të re armëpushimi vazhdojnë në Doha, Katar, por pa përparim konkret deri më tani.
Izraeli ndërpreu një armëpushim 8-javor në mars, duke rifilluar sulmet ajrore që shkaktuan qindra viktima.
Disa ditë para përfundimit të armëpushimit, ndaloi gjithashtu importet në Gaza, përfshirë ushqim, ilaçe dhe karburant, duke përkeqësuar krizën humanitare dhe duke rritur rrezikun e urisë në territorin e rrethuar – një bllokadë që ende vazhdon.
Situata në Gaza mbetet e rëndë dhe përshkallëzimi i fundit po shton vuajtjet e një popullsie tashmë të goditur rëndë nga lufta, mungesa e ndihmës dhe pasiguria e vazhdueshme.
