Të paktën 25 persona janë vrarë pasi një bombë shpërtheu në një stacion hekurudhor në provincën Balochistan të Pakistanit, thonë autoritetet e këtij vendi.
Dhjetëra të tjerë u plagosën nga shpërthimi, i cili ndodhi kur një tren udhëtarësh i linjës së mëngjesit ishte gati të nisej nga stacioni i Quetta në Pakistanin jugperëndimor për në Peshawar.
Një grup militant, Ushtria Çlirimtare e Balochistanit, tha se kreu bombardimin në atë që policia po e konsideron një sulm vetëvrasës.
Kohët e fundit ka pasur një rritje të sulmeve vdekjeprurëse në provincë, të nxitur nga kërkesat për pavarësi dhe kontroll mbi burimet lokale.
Komisioneri i qytetit ka thënë se të paktën 25 persona u vranë, duke përfshirë edhe kamikazin, dhe rreth 50 të tjerë u plagosën nga shpërthimi.
Zyrtari i lartë i policisë Muhammad Baloch tha se shpërthimi mendohet të jetë shkaktuar nga një kamikaz që mbante 6-8 kg eksploziv. Mes të vdekurve dhe të plagosurve ishin civilë dhe ushtarakë, tha ai për BBC.
Ndër të plagosurit e sjellë në Spitalin Civil ishte edhe Abdul Jabbar.
Ai tha se po hynte në stacion, pasi kishte blerë një biletë nga zyra e rezervimeve, kur ndodhi shpërthimi.
“Nuk mund ta përshkruaj tmerrin me të cilin u përballa sot, ishte sikur të kishte ardhur dita e gjykimit”, tha ai.
Muhammad Sohail mbërriti menjëherë pasi kishte ndodhur shpërthimi për të kapur trenin e tij për në Multan.
“Gjithçka u shkatërrua në stacion dhe njerëzit ishin shtrirë në tokë duke bërtitur për ndihmë”, tha ai.
Një grup militant separatist, Ushtria Çlirimtare Baloch, ka marrë përgjegjësinë për sulmin.
Në një deklaratë të lëshuar në mediat sociale, grupi tha se kishte në shënjestër një njësi ushtarake pakistaneze që po kthehej nga Quetta pas përfundimit të një kursi trajnimi.
Kryeministri i Balochistanit e quajti aktin të mjerueshëm dhe autorët “më të këqi se kafshët”. Ai tha se autoritetet do t’i ndjekin dhe “do t’i çojnë në fundin e tyre logjik”.
Kryetari i Asamblesë Kombëtare të Pakistanit, Sardar Ayaz Sadiq, dënoi shpërthimin, duke thënë se përgjegjësit ishin “armiqtë e njerëzimit”.
Balochistani është provinca më e madhe e Pakistanit dhe më e pasura për sa i përket burimeve natyrore, por është më pak e zhvilluar.
Rajoni ndan një kufi të paqëndrueshëm me Iranin dhe Afganistanin e kontrolluar nga talebanët, dhe gjithashtu krenohet me një vijë të gjerë bregdetare përgjatë Detit Arabik.
