Deputeti i AAK-së, Besnik Tahiri pas konstituimit të Kuvendit të Kosovës shprehi pakënaqësitë e tij për votimin në pako të nënkryetarëve të komuniteteve, duke thënë se në legjislaturën e nëntë Slavko Simiq i Listës Serbe u quajt terrorist kur u votua veç e veç, ndërkohë tash në pako u votua.
Tahiri tha se kjo është një situatë që duhej të demaskohej.
“AAK në dy votime abstenoi për shkak se edhe atëherë edhe tash është pro konstituimit të kuvendit. Ka dhënë alternativa dhe propozime për mos të vie në këtë ditë kur Kosova humbi dhe kur qytetarët i morën rezultatet dhe u dëmtuan skajshmërisht. Kjo pako e nënkryetarëve padyshim që zgjodhi një problem. Kjo pako ishte një lloj synimi i kamuflimit të votimit për nënkryetarët, në një kohë Slavko Simiqi, nuk është pranuar, ai u quajt terrorist kur ishte vetëm, ndërkohë kur hyri në pako u votua. Kjo është një situatë të demaskohet dhe t’i thuhet qytetarëve të Kosovës”, tha Tahiri.
Tahiri tha se do të marrin pjesë në votimin e Qeverisë së re, mirëpo do të votojnë kundër.
“Ne do të marrim pjesë nuk e dimë cila është lista e kandidatëve, mirëpo e dimë se siç ka ndodhur herën e kaluar me një procedurë të shpejtë pa prezantimin e një programi. Do të jemi dhe do votojmë kundër”, tha ai.
Ai pohoi se do të jetë shef i grupit parlamentar të AAK-së.
Ndërkohë, ai fajësoi edhe opozitën që nuk është konstituuar kuvendi i Kosovës deri më tani.
