Shefi i Grupit Parlamentar të Aleancës për Ardhmërinë e Kosovës (AAK), Besnik Tahiri, ka deklaruar se kryeministri i Kosovës ka përdorur foltoren e Kuvendit për të sulmuar opozitën dhe për t’ia atribuar asaj përgjegjësinë për situatën politike në vend.
Sipas Tahirit, në seancën e fundit, kryeministri ka keqpërdorur foltoren duke e goditur opozitën në mënyrë të ashpër dhe duke tentuar, siç tha ai, të largojë përgjegjësinë nga vetja.
“Sonte edhe në seancën e fundit, kryeministri i Kosovës e përdori, respektivisht e keqpërdori foltoren duke e goditur skajshmërisht opozitën, duke u munduar t’ua hedhë fajin subjekteve politike opozitare në një gjendje bukur dëshpëruese dhe tronditëse të cilën e solli vetë në Kosovë. Pra edhe sonte u shpreh mllefi i cili buron nga nevoja e tij me marrë dhe me pas pushtet”, ka deklaruar Tahiri.
Ai ka shtuar se sonte ka shpëtuar demokracia në Kosovë.
“Por, nuk u fol për përgjegjësinë që populli i Kosovës ia dha partisë së parë me votë. 66 deputetë, 51 për qind, nuk mjaftuan për të arritur një marrëveshje, një dakordim për një president unifikues. Është për keqardhje. Ajo që dua të them dhe e adresoj sot është se sot shpëtoi demokracia në Kosovë, e cila është fituar me mund, sakrificë dhe gjak. Sot fitoi Kosova. Nuk iu nënshtruam diktatit”, ka thënë Tahiri.
