Selektori i Kombëtares së Shqipërisë, Sylvinho, të hënën doli në konferencën për shtyp, pas publikimit të listës me 27 lojtarët e grumbulluar për dy sfidat e rëndësishme kundër Serbisë dhe Letonisë.
Tekniku kuqezi foli për zgjedhjet e tij, gjendjen fizike dhe formën e lojtarëve të ftuar, si dhe për rëndësinë e këtyre dy ndeshjeve.
Ai u ndal veçanërisht te përballja me Serbinë, duke e cilësuar një ndeshje të fortë, që kërkon përqendrim maksimal dhe përgatitje të detajuar.
Kjo ndeshje luhet më datën 7 qershor në “Arenën Kombëtare” dhe Sylvinho pret angazhim maksimal të ekipit.
“Të përqendrohemi te e para, Serbia. Nuk është ndeshje normale, e di, e njoh historinë. Por ne duhet të përqendrohemi te loja, duhet të bëjmë mirë, të jemi skuadër që lufton me zemër dhe shpirt, të mos humbim identitetin, të shkojmë në fushë e bëjmë futboll. Ata jemi ne. Jam dakord që është ndeshje që duhet përgatitur mirë, e vështirë, por ne kemi shanset tona”, ka thënë Sylvinho.
Sylvinho insistoi se ka 7 ditë kohë për ta bërë gati ekipin, ndërsa shtoi se Shqipëria e njeh mirë si Serbinë ashtu edhe Letoninë, kundërshtar që i quajti të fortë fizikisht. Madje, shtoi se ndaj Serbisë, sigurisht se Shqipëria futet për fitore.
“Futbolli luhet në 90 minuta dhe mund të ndodhë çdo gjë. Kemi pasur një rrugëtim vitin e fundit, duke luajtur me ekipe shumë të forta, por edhe kundërshtari ynë i ardhshëm ka luajtur me kundërshtarë të fortë. Ata janë një skuadër fizike, rinisin mirë, kanë cilësi teknike, por ne duhet të përballemi mirë dhe kemi mundësitë tona”, u shpreh Sylvinho.
Sipas tij, Shqipëria ndaj Serbisë ka nevojë për 27 lojtarët që kanë dëshirë të madhe për të dalë në fushë, të vrapojnë duke lënë zemrën dhe shpirtin.
Ai shtoi se synimi i Shqipërisë është ta siguroj vendin e dytë në grup dhe për këtë arsye si ndaj Serbisë ashtu edhe kundër Letonisë, duhet të marrin pikë.
