Një studim i fundit nga Koreja e Jugut ka zbuluar se orët e gjata në punë nuk ndikojnë vetëm në trup, por lënë gjurmë të dukshme edhe në tru.
Hulumtimi, i realizuar nga universitetet Chung-Ang dhe Yonsei, analizoi 110 punonjës të shëndetësisë, duke i ndarë në dy grupe: ata që punonin të paktën 52 orë në javë dhe ata me një orar standard.
Rezultatet ishin shqetësuese.
Tek personat që punonin më shumë se zakonisht, studiuesit zbuluan ndryshime në strukturën e rajoneve të trurit që kontrollojnë mendimin dhe emocionet, një efekt i lodhjes së vazhdueshme dhe stresit të akumuluar.
Profesor Yun-Jul Choi, bashkautor i studimit, vëren se megjithëse truri ka potencial për t’u rikuperuar, ai ka nevojë për kohë dhe eliminimin e faktorëve stresues për t’u kthyer në gjendjen e tij të natyrshme.
Ky studim përforcon zbulimet e mëparshme që lidhin orët e zgjatura të punës me probleme serioze shëndetësore.
Eksperti i shëndetit publik Frank Pega e quan këtë një dëshmi të re të rëndësishme, e cila duhet të shërbejë si alarm për qeveritë, punëdhënësit dhe vetë punëtorët.
Studiuesit nga Koreja theksojnë se, ndonëse studimi është në përmasa të vogla, ai mbështetet në matje të thella neurologjike dhe tregon drejtpërdrejt ndikimin rrënjësor të mbingarkesës në shëndetin mendor.
Prandaj, ata i bëjnë thirrje institucioneve të mos injorojnë pasojat që mund të sjellin orët e tepërta të punës.
