Profesori universitar, Nexhmedin Spahiu, ka hedhur akuza ndaj kryetarit të Prishtinës, Përparim Rama, duke deklaruar se ai nuk ka të ardhme politike në LDK dhe se për veprimet e tij është dashur të përballet me drejtësinë.
Spahiu tha se Rama është politikisht më afër PDK-së sesa partisë në emër të së cilës është zgjedhur kryetar i kryeqytetit.
“Rama nuk ka të ardhme në LDK. Eventualisht, Rama mund të bëhet kryetar i PDK-së, nëse Sami Lushtaku vendos që ta heq Bedri Hamzën. Rama është duke bërë abuzime aq të mëdha, saqë është dashur të shkojë në burg. Sot, e morëm vesh që e ka heq flamurin e Kosovës, konkretisht flamuj që i ka vendosur Ramush Haradinaj në kohën kur ka qeverisur te spitalet , te rruga ‘B’, te hyrja prej Mitrovicës, etj, edhe heqja e flamurëve të Kosovës e vendosja e flamurëve të UÇK-së është keqpërdorim akoma më i madh, sepse flamuri i UÇK-së e ka vendin në muze, sepse në radhë të parë iu takon dëshmorëve”, tha ai në emisionin “Këndi i Debatit” në Tëvë1.
Spahiu e akuzoi kryetarin e Prishtinës edhe për abuzime të rënda gjatë ushtrimit të detyrës.
Spahiu përmendi edhe çështjen e largimit të flamujve të Kosovës nga disa hapësira publike në kryeqytet, duke pretenduar se ata janë zëvendësuar me flamuj të UÇK-së.
Sipas tij, një veprim i tillë përbën si keqpërdorim të simbolikës së Ushtrisë Çlirimtare të Kosovës, ashtu edhe cenim të simboleve shtetërore.
“Kur një person i heq flamujt e Kosovës nga kryeqyteti, kjo është vepër penale, s’është simbolikë’. Janë dy sene, edhe keqpërdorim i UÇK-së edhe poshtërim i flamurit të Kosovës”, deklaroi ai. /teve1.info/
