Në Departamentin Special të Gjykatës Themelore në Prishtinë, sot pritet të shpallet aktgjykimi ndaj Millosh Pleskoviqit, i njohur me nofkën “Miki”, i cili akuzohet për krime lufte kundër popullatës civile gjatë luftës në Kosovë.
Sipas aktakuzës së Prokurorisë Speciale, Pleskoviqi në bashkëkryerje dyshohet se më 1 shtator të vitit 1998, në afërsi të lagjes “Hoqa Mahalla” në Prizren, mori pjesë në vrasjen e tre civilëve shqiptarë: dy anëtarëve të familjes Daçaj (B.D. dhe R.D.) dhe Fatmir Bojaxhiut (F.B.).
Ngjarja tragjike ndodhi kur viktimat, së bashku me tre të mbijetuar – Fevzi Cana, Xhenger Cana dhe Bashkim Kastrati – kishin shkuar në malin afër për të mbledhur dru për ngrohje. Sipas dëshmive, ata ishin ndaluar nga një grup prej 7-8 personash të armatosur serbë, të veshur me uniforma policore dhe ushtarake, të cilët i kishin fyer dhe urdhëruar të ndaleshin.
Në mesin e tyre, të mbijetuarit e kishin identifikuar të pandehurin Millosh Pleskoviq, i cili sipas aktakuzës kishte hapur zjarr me armë automatike të tipit “kallashnikov” ndaj grupit. Si pasojë, tre nga ta mbetën të vrarë në vend, ndërsa të tjerët shpëtuan duke ikur në drejtim të shtëpive të tyre.
Një veprim heroik është përshkruar nga i ndjeri B.D., i cili e kishte shtyrë me krah Xhenger Canën për ta shpëtuar, pasi ishte më i riu në grup. Pas një jave, trupat e pajetë të viktimave u gjetën të gjymtuar – njëri pa kokë dhe tjetri pa njërën këmbë.
Millosh Pleskoviq u arrestua më 30 shtator 2023, në fshatin Uglar, ku jetonte pas largimit nga Prizreni. Që nga ajo kohë ai ndodhet në paraburgim. Në seancën e janarit 2025, ai u deklarua i pafajshëm, ndërsa dëshmitarët paraqitën versionet e tyre të ngjarjes në sallën e gjyqit.
Vendimi i gjykatës për këtë rast pritet të shpallet gjatë ditës së sotme.
