Të shtunën (sot) luhet ndeshja e parë e Kombëtares U19 të Kosovës në Kampionatin Evropian (B) të hendbollisteve.
Nga ora 16:30 (sipas kohës në vendin tonë), Kosova U19 luan me Bullgarinë. Evropiani po mbahet në Telavi të Gjeorgjisë.
Ndeshja Kosovë – Bullgari është dashur të jetë e para e ditës dhe të zhvillohej nga ora 8:30 (sipas kohës në vendin tonë). Por Kombëtarja jonë ka arritur në Telavi vetëm në orët e para të mëngjesit të së shtunës, për shkak të pengesave të paarsyeshme të autoriteteve gjeorgjiane për të hyrë në këtë vend. Udhëtimi nga Stambolli për në Gjeorgji është dashur të bëhet të premten paradite, por delegacioni ynë nuk u lejua të futet në aeroplan pasi për këtë nuk dhanë leje autoritetet gjeorgjiane. Leja u dha pak pasi u nis aeroplani dhe kështu fluturimi u bë të premten vonë, ndërsa vajzat tona në hotel u vendosën në orët e para të mëngjesit të së shtunën. Me insistimin e FHK-së, EHF-ja është pajtuar që ta ndryshojë terminin e ndeshjes.
Përkundër telasheve gjatë udhëtimit, vajzat tona janë të përkushtuara që të japin më të mirën dhe ta nisin me fitore Kampionatin Evropian.
