Dy nga ekipet me paraqitjet më të dobëta gjatë këtij edicioni në Superligën e Kosovës në futboll, Prishtina dhe Llapi, do të përballen në finale të Kupës të enjten mbrëma në stadiumin “Fadil Vokrri”.
Fituesi i Kupës “shpëton” sezonin dhe siguron paraqitjen në garat evropiane në edicionin e ardhshëm.
Prishtina është e shtata në tabelë, pak mbi zonën e rënies, kurse Llapi është në zonën e barazhit, përkatësisht në vendin e tetë.
Derisa Prishtina fundjavën e kaluar me vështirësi siguroi mbijetesën në Superligë, Llapit i duhet fitore në xhiron e fundit për të siguruar barazhin e pastaj nëpërmjet tij mbetjen në elitën e futbollit kosovar.
Prishtina e Llapi kanë eliminuar nga katër skuadra në rrugën drejt finales, e cila luhet të enjten nga ora 20:00 në stadiumin që mban emrin e legjendës Vokrri, që nisi karrierën te Llapi dhe arriti kulmin te Prishtina.
Prishtina synon kthimin në Evropë pas tre vjetësh.
Prishtina ka fituar tetë herë Kupën e Kosovës. Së fundi në finale të Kupës u paraqit në edicionin e kaluar. Humbi nga Ballkani pas ekzekutimit të penalltive.
Llapi ka fituar dy herë rresht Kupën – në edicionet 2020/2021 dhe 2021/2022.
Prishtina e Llapi janë përballur tri herë gjatë këtij edicioni në Superligë. Të tria ndeshjet nuk kanë dhënë fitues.
