Politologu, Avdi Smajljaj e ka vlerësuar vendimin e Komisionit Qendror të Zgjedhjeve (KQZ) për moscertifikimin e Listës Serbe si “patriotizëm kozmetik të lodhur”, duke theksuar se një veprim i tillë vjen si pasojë e mungesës së patriotizmit substancial dhe funksionimit të dobët të institucioneve shtetërore.
Në emisionin “Këndi i Debatit” në Tëvë1, Smajljaj ka thënë se partitë politike në Kosovë shpesh shfaqin qëndrime kontradiktore, duke vepruar ndryshe jashtë syrit të publikut dhe ndryshe para tij.
“Sipas informacioneve, tinëzisht jashtë publikut, të gjitha partitë politike janë takuar me përfaqësues të Listës Serbe. Kjo tregon mungesë konsistence, një gjë bëhet prapa skenës, ndërsa një tjetër para opinionit publik. Këtë e shoh si patriotizëm kozmetik të lodhur, në mungesë të patriotizmit substancial”, ka deklaruar ai.
Smajljaj ka theksuar se përgjegjësia për mosfunksionimin e sundimit të ligjit bie mbi partitë politike, pasi ato hartojnë ligjet dhe duhet të mbikëqyrin zbatimin e tyre.
“Nëse nuk funksionojnë organet e sigurisë dhe sundimit të ligjit, adresa e parë ku duhet drejtuar gishti janë partitë politike. Nuk e përjashtoj asnjërën. Funksionimi i shtetit varet drejtpërdrejt nga to, ndërsa mungesa e këtij funksionimi zëvendësohet me patriotizëm për sy e faqe”, është shprehur ai.
Duke folur për qëndrimin ndërkombëtar ndaj Listës Serbe, Smajljaj ka thënë se ai dallon nga perceptimi që ekziston në Kosovë.
“Ndërkombëtarët kanë një pikëpamje tjetër për Listën Serbe. Ata e shohin si një parti që përfaqëson shumicën e komunitetit serb dhe si një mekanizëm për integrimin e këtij komuniteti në institucionet e shtetit të Kosovës”, ka theksuar ai.
Sipas Smajllajt, në rast se Lista Serbe nuk do të certifikohej, pasojat politike për shtetin do të ishin të konsiderueshme, duke pasur parasysh obligimet që Kosova ka marrë me Pakon e Ahtisaarit.
Ai shtoi se kjo çështje është dashur të trajtohet nga institucionet e rendit dhe sundimit të ligjit, e jo t’i lihet KQZ-së, pasi anëtarët e saj nuk kanë kompetencë të mjaftueshme për të ndaluar subjektet politike përmes moscertifikimit.
