Tre futbollistë të Llapit janë vënë në radarin e klubi çek Slavia nga Praga, ka bërë të ditur trajneri i ekipit nga Podujeva, Tahir Batatina.
Skuadra lidere e Superligës, mund të bëhet epiqendër e talenteve për Evropën pas takimeve të fundit të Batatinës me zyrtarë nga futbolli çek.
Në një postim në Facebook, Batatina ka shkruar për fillimin e një takimi të frytshëm.
“Kisha kënaqësinë që të takohem sot me Jiri Bilek, Drejtor Sportiv i Slavia Pragë, Milan Martinovič, menaxher ndërkombëtar kroat si dhe Agim Saraçi, menaxher shqiptar në Çeki ku dakorduam për bashkëpunimin mes dy klubeve, Llapi dhe Slavia Pragë.
Kisha nderin që një klub i madh i Evropës ka besimin e plotë për të bashkëpunuar me Llapin si dhe së shpejti do të jem i ftuar në klubin e madh, Slavia Pragë për të diskutuar detaje edhe më të rëndësishme.
Një lajm shumë i madh për talentët kosovar, e sidomos për futbollistët e Llapit pasi që për tre futbollistë veç se kanë shprehur interesim për të filluar bisedimet zyrtare.
Drejtori Sportiv i Slavia Pragë, Jiri Bilek u nda shumë i kënaqur me mënyrën e funksionimit të klubit tonë dhe projektin afatgjatë që e prezantova para tyre për gjithë talentët e futbollit kosovar.
Pra, Llapi do jetë një urë lidhëse me një skuadër të organizuar mirë si Slavia Pragë”, ka shkruar Batatina.
