Triumfi në Kupë i Juventusit, të mërkurën mbrëma, i dha fund një periudhe prej tri vjetësh pa trofe, në Itali, megjithëse para kësaj vinte nga një seri prej nëntë titujve kampionë.
“Zonja e Vjetër” iu gëzua Kupës së 15-të në Itali dhe këtë e arriti duke e mposhtur Atalantën në finalen e Romës, me rezultat 1:0.
Festa ishte e madhe e bardhezinjve, por ajo që ra në sy ishin reagimet epike të trajnerit Max Allegri, i cili ishte i kritikuar për formën dhe lojën e ekipit të tij.
Allegri fitoi vetëm trofeun e parë, në rikthimin e tij te Juve, por që pak para fundit të ndeshjes, u përjashtua nga loja me reagimin ndaj gjyqtarëve, e pas ndeshjes, ai u zu nga kamerat duke u shfryrë në drejtorët e skuadrës Giuntoli e Scanavino, por edhe ndaj kryeredaktorit të gazetës Tuttosport, Guido Vaciago.
Ai nuk u përfshi as në festën e lojtarëve, duke qëndruar anash me stafin e tij, që nënkuptojnë vetëm një gjë, largimin e tij në fund të këtij sezoni.
Këtë e din edhe tekniku italian, i cili bëri shou pas ndeshjes, duke u zënë me drejtorin e skuadrës Giuntolin, me gazetarët, të cilët iu tregonte se çfarë të shkruajnë dhe se ia kanë arritur qëllimit, ta largojnë nga ekipi.
Juventusi, sipas medieve në Itali, tashmë ka kontaktuar trajnerin e Bolognas Thiago Motta, të cilit i kanë ofruar kontratë dyvjeçare për të rikthyer trofetë dhe suksesin në Torino.
