Shtetet e Bashkuara të Amerikës janë shprehur të zhgënjyer me siç kanë thënë veprimet e njëanshme të Qeverisë së Kosovës për mbylljen e degëve të postave serbe në veri të Kosovës.
Në një reagim të publikuar nga ambasada e ShBA-së në Kosovë, thuhet se veprime të tilla i vënë qytetarët e Kosovës dhe ushtarët e KFOR-it në rrezik.
“Veprimet e pakoordinuara të Kosovës i vënë qytetarët e Kosovës dhe ushtarët e KFOR-it në rrezik më të madh, përshkallëzojnë në mënyrë të panevojshme tensionet rajonale dhe minojnë reputacionin e Kosovës si një partner i besueshëm ndërkombëtar. Ne i bëjmë thirrje Qeverisë së Kosovës që të ndërpresë çdo veprim të mëtejshëm të njëanshëm dhe t’i kthehet angazhimit konstruktiv në Dialogun e lehtësuar nga BE-ja për të zgjidhur çështjet që kanë të bëjnë me normalizimin e marrëdhënieve ndërmjet Kosovës dhe Serbisë”, thuhet në reagim.
Për aksionin ka reaguar edhe Bashkimi Evropian duke thënë se veprimi ishte i njëanshëm dhe i pakoordinuar.
Por në një sqarim nga ARKEP është bërë e ditur se Posta e Serbisë në Kosovë vepron ilegalisht, duke thënë se Serbia kishte refuzuar që kjo çështje të zgjidhet në dialog.
Ndërsa Policia e Kosovës ka bërë të ditur se në këtë aksion janë mbyllë nëntë pika të kësaj poste dhe janë shoqëruar dy persona të cilëv u është shqiptuar gjobë për mospërfillje të urdhërit të Policëve dhe rasti shkon në procedurë të rregullt
