U zgjuan që në orët e para të mëngjesit. Pikëtakim kishin stacionin e autobusëve ne Mitrovicën e Veriut.
Qytetarët serbë të Kosovës po bëhen gati për tu nisur në mënyrë të organizuar në Beograd.
Këta dëshirojnë që nga afër ta përcjellin betimin e Presidentit të rizgjedhur serb, Aleksander Vuciq.
Me vete u kujdesën të merrnin edhe pankarta me mbishkrime se Serbet nga Kosova janë me Presidentin Vuçiq.
Kur mbërritën në Beograd u bënë bashkë me qytetarë tjerë. E këtu u panë edhe disa deputetë të Kuvendit të Kosovës nga Lista Serbe, përfshirë edhe kryetarin e kësaj partie njëherit ministrin Goran Rakiq.
E këta qytetarë serbe që erdhën nga Kosova, politikani nga Vojvodina, Nenad Çanak në një intervistë për Tëvë1, i ka quajtur pengje të ideve nacionaliste.
“Ata ende nuk e pranojnë faktin se Kosova është e pavarur nga Serbia. Dhe, për ta, Vuçiq është simbol i një lloj “patriotizmi”, dhe “mbrojtës” i “serbizmit” në Kosovë. Ata janë, në fakt, pengje të ideve nacionaliste për 30 vitet e fundit dhe, në të njëjtën kohë, shfrytëzues të mbështetjes bujare financiare që Serbia po ia dërgon Kosovës. Po ashtu, disa prej tyre po e shfrytëzojnë këtë pozitë të papërcaktuar të veriut të Kosovës për kontrabandë mallrash, madje edhe për aktivitete kriminale”, tha ai.
Ndërkaq, edhe njohësi i zhvillimeve politike, Visar Ymeri, thotë se Presidenti serb Aleksander Vuçiq ka krijuar iluzione tek qytetarët serb.
Në anën tjetër, Lista Serbe po shihet si faktor që ka ndikuar tek qytetarët serb për të votuar për liderin e partisë progresive.
“Për mua nuk përbën ndonjë befasi, duke e parë që Lista Serbe është opsioni i vetëm tek qytetarët serb në Kosovë. Lista Serbe i ka udhëzuar qytetarët serb që të votojnë për partinë progresive të Vuçiqit. Por fatkeqësisht as Qeveria e Kosovës nuk është se bën diçka për të kuptuar realisht problemet që kanë komuniteti serb në Kosovë”, tha Miodrag Miliceviq, aktivist i shoqërisë civile në Mitrovicën e Veriut.
Gjatë betimit, Aleksandar Vuciq, premtoi se ai do të vazhdojë të luftojë që ti mbrojë serbët dhe fëmijët e tyre që jetojnë në Kosovë.
Raporti i gazetarit Shpat Blakçori.
