Gara për titullin e kampionit në Rumani ka përfunduar, ku Steaua e Bukureshtit është shpallur kampionit. Por, një garë tjetër ka mbetur e hapur, ajo për epitetin e golashënuesit më të mirë në Rumani.
Në garë për “Këpucën e Artë” të këtij edicioni janë Florinel Coman i Steauas, Albion Rrahmani i Rapid Bukureshtit dhe Philip Otele i Clujit. Listës i prinë Coman me 18 gola të realizuar, ndërsa Rrahmani e Otele kanë nga 17 secili kur ka mbetur edhe një ndeshje deri në fund të edicionit.
Rrahmanit i duhen edhe dy gola për t’u shpallur goilashënuesi më i mirë, ndërsa Coman dhe Otele mos të shënojnë asnjë.
Rapidi i Bukureshtit, të dielën përballet me Steauan në ndeshjen e fundit të play-offit, e cila nis në orën 21:00. Për Rrahmanin, ky është edicioni i parë në Rumani pasi iu bashkua Rapidit nga Ballkani i Suharekës për 600 mijë euro.
Ai me Rapidin ka kontratë deri në vitin 2026, ndërsa në verë pritet të largohet nga ky ekip që për kartonin e tij po kërkon 10 milionë euro. Në garë për shërbimet e Rrahmanit janë Napoli, Aston Villa, Benfica, Werder Bremeni, Sparta e Slavia e Pragës, si dhe skuadra nga Hungaria.
