Sulmuesi Albion Rrahmani do t’i nënshtrohet operimit në nyjën e këmbës së djathtë, pas lëndimit që e mori në ndeshjen kundër Andorrës.
Kosova fitoi në udhëtim tek Andorra të enjten mbrëma 3:0, ndërsa Rrahmani që ishte titullar, u largua nga loja me barele në minutën e 66-të.
Ndeshja ishte e rëndësishme për kualifikim në Evropianin e vitit të ardhshëm.
“Sulmuesi ynë Albion Rrahmani ka pësuar lëndim, me ç’rast menjëherë është dërguar për ekzaminime mjekësore në spitalin e qytetit në Andorra La Vella. Pas këtyre ekzaminimeve ka rezultuar se ai ka pësuar frakturë në kyçin e këmbës së djathtë dhe do t’i nënshtrohet operimit”
Rrahmani 23-vjeçar në verën e këtij viti u transferua te Rapidi i Bukureshtit nga kampioni i Kosovës, Ballkani, për 600 mijë euro.
Ka shkëlqyer në Superligën e Rumanisë duke shënuar gjashtë gola, ndërsa ka kontribuuar edhe me dy asistime. Ishte ndeshja e tij e dytë me fanellën e Kosovës, pas debutimit që e pati ndaj Rumanisë në muajin shtator.
