Prokuroria Themelore në Ferizaj ka paraqitur kërkesë në Gjykatën Themelore për caktimin e masës së paraburgimit ndaj të pandehurit A.S., i cili dyshohet për disa vepra penale.
Sipas njoftimit të Prokurorisë, i dyshuari është arrestuar në Francë pas lëshimit të urdhërarrestit ndërkombëtar nga organet kompetente, ndërsa më 17 nëntor 2026 është ekstraduar në Republikën e Kosovës.
Që nga ajo datë, ai ndodhet në masën e ndalimit me vendim të Prokurorit të Shtetit.
Sipas dyshimeve të Prokurorisë, rasti ka ndodhur më 19 korrik 2024, rreth orës 12:00, në shtëpinë e të pandehurit në Ferizaj.
Në aktin e dyshuar, viktima, e shoqëruar nga djali i axhës L.S., kishte shkuar te prindërit e të pandehurit për t’i marrë fëmijët që ndodheshin në vizitë.
Në atë rast, i dyshuari, sipas Prokurorisë, e kishte detyruar atë të hynte brenda shtëpisë nën kërcënimin e armës, me të cilën kishte shtënë disa herë në tokë.
Prokuroria pretendon se pasi kanë hyrë brenda, i dyshuari e ka sulmuar fizikisht viktimën, duke e goditur me shuplakë, duke e kapur disa herë për flokësh dhe duke e goditur me shkelm në bark.
Më pas, sipas aktit të dyshuar, ai ka kryer marrëdhënie seksuale me të pa pëlqimin e saj.
Përveç veprës penale të dhunimit, A.S. dyshohet edhe për veprat penale “mbajtje të paautorizuar të armës”, “përdorim të armës apo mjetit të rrezikshëm”, si dhe “kanosje”.
Sipas Prokurorisë, i dyshuari e kishte kërcënuar L.S.-në se do ta vriste viktimën dhe atë vetë, në rast se nuk ia sillte dokumentet dhe nëse e lajmëronte rastin në polici.
Pas kryerjes së veprave për të cilat dyshohet, i pandehuri ishte larguar nga vendi i ngjarjes dhe kishte qëndruar jashtë territorit të Kosovës, deri në arrestimin e tij në Francë./teve1.info/








