Është minuta e 92-të e ndeshjes së Evropianit të futbollisteve mes Zvicrës dhe Finlandës. Geraldine Reuteler dërgon një top në zonë. Është një pasim i përkryer për Riola Xhemailin që dërgon topin në rrjetë nga pesë metra largësi. Stadiumi në Gjenevë shpërthen. Ishte goli për 1:1.
“Goli që do të mbetet në histori të futbollit zviceran”, shkruan mediumi “20 Minuten”.
Me atë gol, Zvicra u kualifikua për herë të parë në çerekfinale të Kampionatit Evropian. Evropiani po mbahet në Zvicër, ndërsa thuajse i gjithë ky vend festoi të enjten mbrëma.
Shqiptarja 22-vjeçare ishte shumë e lumtur pas ndeshjes.
“Kam dashur të vrapoj drejt tifozëve, por kishte një rrethojë dhe nuk kam dashur të rrëzohem në të”, ka thënë Xhemaili kur është pyetur se çka i shkoi në mendje pasi e shënoi golin e historisë.
“Është e mahnitshme. Është ndjenja më e mirë që kam përjetuar ndonjëherë. Është sikur një ëndërr e bukur që realizohet”.
Ajo nuk ka mundur të besojë se çka ndodhi, sidomos pas një viti të vështirë. Ndonëse kishte një vit të shkëlqyer te PSV Eindhoveni në Holandë, duke shënuar 14 gola dhe duke bërë gjashtë asistime në 26 ndeshje, Riola nuk ishte në planet e selektores së Zvicrës, Pia Sundhage. Nuk u ftua në disa grumbullime, ndërsa në fillim të qershorit bëri paraqitjen e parë këtë vit. Dhe shkëlqeu.
“Dhe tani ajo u bë heroinë e madhe e vendit”, vazhdon shkrimin gazeta e madhe zvicerane “20 Minuten”.
Riola është ndier mirë para se të aktivizohej. Ajo hyri në lojë vetëm në minutën e 82-të.
“E kam ditur se do të shënoj atë gol. Pasi erdhi topi e kam ditur se ku duhet të jem. Është dashur vetëm të mos jem në ofsajd. Dhe më pas goli hyri në portë. Është e ëmbël që e përjetojmë këtë, e meritojmë”, ka thënë Xhemaili, që është e lumtur që i bëri krenarë familjarët e saj.
“Shumë kanë dyshuar në mua. Por mendoj se kam treguar pse jam këtu dhe që mund ta ndihmoj ekipin”, ka thënë futbollistja shqiptare.
“Blick” ka shkruar se Xhemaili ka shënuar golin në momentin më të mirë në histori të përfaqësueses së Zvicrës.
“Është e pabesueshme se si po e bëjmë Zvicrën të festojë”, ka vazhduar sulmuesja.
Kapitenia e Zvicrës, Lia Walti ka lavdëruar Riolën.
“Rio ka kualitetin që shumë të tjera nuk e kanë – ajo bën të papriturën. Jam jashtëzakonisht krenare për të, që u bë fituesja e ndeshjes për ne”, ka thënë Walti.
Evropiani i futbollisteve po përcillet me shumë interesim në Zvicër. Në stadium për ndeshjen ndaj Finlandës ishin 26 mijë shikues. Në televizion ndeshjen e shikuan mbi 1 milion shikues.
Kishte festë në Gjenevë dhe në qytetet tjera të Zvicrës. Falë një futbollisteje shqiptare.
