Dy javë pas aksionit të Prokurorisë Speciale të Kosovës dhe Policisë në Ministrinë e Mjedisit, Planifikimit Hapësinor dhe Infrastrukturës është zgjeruar pista e hetimit edhe me ministrin e këtij dikasteri, Liburn Aliu. Sipas aktvendimit që e ka parë televizioni, ministri Aliu ka qenë në dijeni për këto keqpërdorime rreth ambalazhuesve të ujit dhe i njëjtit ka keqpërdorur detyrën zyrtare. Njohësit e sistemit të drejtësisë tregojnë se çfarë hapa ndërmerren në aspektin ligjor në këto raste.
Të martën e 8 tetorit, Prokuroria Speciale bashkë me Policinë e Kosovës e filluan një aksion në Ministrinë e Mjedisit, Planifikimit Hapësinor dhe Infrastrukturës.
Nga ky aksion, u arrestuan dy zyrtarë të këtij dikasteri nën dyshimet për keqpërdorime të detyrës rreth çështjes së ambalazhuesve të ujit.
E dy javë pas aksionit, Prokuroria Speciale e Kosovës ka vendosur që të zgjerojë pistën e hetimeve edhe me ministrin e MMPHI-së, Liburn Aliu.
Sipas aktvendimit që ka parë televizioni, Aliu ka qenë në dijeni për keqpërdorimet e dy zyrtarëve të tjerë.
Madje dyshohet që edhe vetë ministri ka keqpërdorur pozitën apo autoritetin zyrtar, duke i shkaktuar dëm prej miliona eurove Buxhetit të Republikës së Kosovës.
Nga Prokuroria Speciale të martën nuk kanë dhënë detaje rreth zgjerimit të këtyre hetimeve dhe as rreth pyetjeve nëse është ftuar për intervistim ministri Aliu.
Mirëpo, burimet e televizionit brenda kësaj ministrie kanë thënë se ministri Liburn Aliu ende nuk ka pranuar njoftim zyrtar në lidhje me këtë çështje.
Se si shkon procedura në aspektin ligjor, tregon avokati Anton Ndrecaj.
Sipas Ndrecaj, në vendet e huaja nëse ndodh e njëjta gjë me një zyrtar të lartë të shtetit ai moralisht jep dorëheqje nga pozita.
Nën dyshimet për keqpërdorim të detyrës zyrtare është arrestuar ushtruesi i detyrës në pozitën e Udhëheqësit të Autoritetit të Rajonit të Pellgjeve Lumore në Ministrinë e Mjedisit, Naser Hafizi.
Ndërsa, zëvendëssekretari në këtë dikaster, Izet Bytyqi ndodhet në arrest shtëpiak.
