Mesfushori Ylber Ramadani insiston se Kombëtarja e Shqipërisë do të synoj ta mposht Italinë në kuadër të Kampionatit Evropian që mbahet këtë vit në Gjermani.
Ramadani, i cili bën karrierë në Serie A te skuadra e Lecces, ka insistuar se Shqipëria do të futet për fitore ndaj kampiones në fuqi të Evropës. Dueli mes Italisë dhe Shqipërisë, luhet më 15 qershor dhe është i pari për të dy kombëtaret në kuadër të Grupit B.
“Do të jetë një ndeshje komplekse sepse unë luaj këtu në Itali. Italia është një ekip I fortë, por ne gjithashtu do të luajmë për ta fituar këtë ndeshje”, është shprehur Ramadani për mediumet italiane.
Pas duelit me Italinë, Shqipëria do të përballet edhe me Kroacinë e Spanjën, të cilat po ashtu janë pjesë e Grupit B në “Euro 2024”.
Me Kroacinë, Shqipëria do të luaj më 19 qershor, ndërsa duelin e fundit në grup e luan ndaj Spanjës me 24 qershor. Ramadani 27-vjeçar ka 34 paraqitje dhe një gol të shënuar me fanellën e Shqipërisë, ndërsa skuadrës së Lecces iu bashkua vitin e shkuar.
Në edicionin e tij të parë në kampionatin italian, Ramadani ka shënuar 1 gol në 28 ndeshje të luajtura.
