Kryetari i Prishtinës, Përparim Rama ka reaguar lidhur me zhvillimet e fundit në Skenderaj, duke akuzuar kryeministrin në detyrë Albin Kurti për tensionim të situatës dhe përdorim politik të institucioneve shtetërore.
Rama deklaroi se ngjarjet në Skenderaj po shfrytëzohen për krijimin e përçarjeve dhe për thellim të polarizimit politik në vend.
Ai tha se përdorimi i policisë dhe retorikës politike përballë qytetarëve nuk kontribuon në qetësi dhe stabilitet.
Kryetari i Prishtinës kritikoi edhe qasjen e Kurtit ndaj institucioneve të drejtësisë, duke përmendur refuzimin e tij për t’iu përgjigjur ftesës së Prokurorisë Speciale.
Sipas Ramës, prania e shtuar e forcave policore në Drenicë krijon perceptimin e demonstrimit të forcës dhe tensioneve politike, ndërsa paralajmëroi se situata të tilla mund të ndikojnë negativisht në stabilitetin social dhe politik në Kosovë.
“Ky tensionim i qëllimshëm dhe këto tentativa për destabilizim politik janë jashtëzakonisht të rrezikshme për popullin dhe shtetin e Kosovës. Drenica nuk e meriton këtë. Kosova nuk e meriton këtë”, ka deklaruar Rama.
