Mandati 2021-2025, po iu shkon drejt fundit.
Një varg punësh u kanë mbetur në gjysmë, e një numër i konsiderueshëm e zotimeve për tyre për këtë mandat, nuk kanë filluar fare.
Sipas një studimi të Institutit GAP, kryetarët aktual të komunave kishin dhënë 1815 premtime.
Prej tyre, 918 u vlerësuan si të përfunduara, gjë që për Bekim Salihun nga GAP, është shifër e kënaqshme.
“Shikuar në nivel të përgjithshëm del se 51% e premtimeve janë përmbushur, dhe një përqindje tjetër janë gjysmë të përmbushura dhe të filluara, kurse vetëm 21% e premtime nuk janë përmbushur e as nuk kanë filluar. Kjo përqindje është relativisht e kënaqshme, pra e kalon gjysmën e premtimeve, ku kryetarët e komunave kanë pasur rezultate konkrete”, tha Bekim Salihu nga Instituti GAP.
Mospërmbushja e premtimeve të tjera, konsiderohet se lidhet edhe me sfidat që kanë karakterizuar këtë katër vjeçar.
“Arsyeja e parë ka qenë pandemia, pastaj rikuperimi nga kjo gjendje e pandemisë ka ardhë çështja e luftës në Ukrainë, përkatësisht inflacioni. Pastaj, shuarja e fondeve amerikane nga ana e agjencive amerikane, bllokimi i fondeve të BE-së. e deri tek përmbarimet nga ana e gjyqësorit që lidhen me kontratat kolektive”, tha ai.
Fushat që më së shumti preken nga premtime që nuk realizohen llogariten të jenë nga infrastruktura deri tek arsimi.
“Faktorët kryesor që ndikojnë në mosrealizimin e këtyre premtimeve është mungesa e planifikimit strategjik, shto kësaj faktin e keqmenaxhimit të buxheteve, ndikimi politik dhe partiak, dhe mungesa e transparencës. Sektorët ku ka më së shumti ngecje, dihet se janë infrastruktura publike, menaxhimi i mbeturinave, shëndetësia lokale dhe arsimi”, tha njohësi i qeverisjes lokale, Valmir Ilazi.
Në zgjedhjet e kaluara, katër komunat veriore bashkë me komunën e Mamushës, ishin komunat e vetme që nuk kishin dhënë asnjë premtim elektoral.
