Prokuroria Themelore në Pejë, të premten me mbështetjen e OSBE-së, ka organizuar tryezë me temën “Rastet e dhunës në familje dhe trajtimi i personave të paraburgosur me nevoja të shëndetit mendor”.
Në ketë tryezë pune, të udhëhequr nga Kryeprokurori i Prokurorisë Themelore në Pejë, Agim Kurmehaj, diskutimet e zhvilluara kishin fokus zgjidhjen e problemeve të dhunës në familje, me një theks të veçantë në trajtimin e personave që vuajnë nga probleme të shëndetit mendor.
“Konkluzionet e arritura gjatë tryezës ishin: rritja e kapaciteteve njerëzore, financiare dhe infrastrukturore për strehimin dhe trajtimin e personave të paraburgosur me nevoja të shëndetit mendor në nivel qendror dhe lokal, realizimi i premtimit të Komunës së Pejës, për ndarjen e parcelës së tokës për ndërtimin e qendrës për trajtimin dhe rehabilitimin e personave me nevoja të shëndetit mendor si dhe rritja e bashkëpunimit ndër-institucional për rastet e dhunës në familje dhe të personave të paraburgosur me nevoja të shëndetit mendor”, thuhet në komunikatë.
Ndërkaq, koordinatorja e dhunës në familje në Prokurorinë Themelore në Pejë, Arlinda Nallbani Gacaferri, ka njoftuar të pranishmit se deri më tani janë pranuar 259 kallëzime penale për veprën penale “Dhuna në familje”, prej të cilave janë ngritur 208 aktakuza si dhe janë kërkuar 38 masa paraburgimi e 16 ekzaminime psikiatrike për të dyshuarit.
Kontribut në diskutime dhe rekomandime kanë dhënë edhe nga Zyra e Kryeprokurorit të Shtetit, prokurori Lulzim Sylejmani, Ministrja e Drejtësisë, Albulena Haxhiu, përfaqësuesi i OSBE-së, Mark Lasser dhe zyrtarë të Gjykatës Themelore të Pejës dhe Policisë së Kosovës. teve1.info/
