Prokuroria Themelore në Ferizaj ka kërkuar nga Gjykata Themelore caktimin e masës së paraburgimit ndaj të dyshuarit me inicialet E.Gj., i cili dyshohet për veprat penale “Mundësimi ose detyrimi në prostitucion” dhe “Ofrimi i lokaleve për prostitucion”, të parapara me Kodin Penal të Republikës së Kosovës.
Sipas njoftimit të Prokurorisë, ekziston dyshimi i bazuar se gjatë muajit qershor 2026, i dyshuari, në cilësinë e menaxherit të një moteli në rrugën “Ilir Konushevci” në Ferizaj, ka vënë në dispozicion lokalin e tij për ushtrimin e prostitucionit.
Po ashtu, Prokuroria pretendon se ai ka mundësuar ushtrimin e prostitucionit duke punësuar një grua me inicialet B.Xh., me qëllim që të ofronte shërbime seksuale me pagesë për klientët e motelit.
Sipas autoriteteve, më 29 qershor 2026, pas zbatimit të masave të veçanta hetimore, i dyshuari është kapur në flagrancë dhe është arrestuar nga zyrtarët policorë.
Me vendim të Prokurorit të Shtetit, E.Gj. ndodhet nën masën e ndalimit prej 48 orësh, ndërsa Prokuroria ka kërkuar që ndaj tij të caktohet masa e paraburgimit. Për rastin, procedurat gjyqësore janë në vijim dhe i dyshuari konsiderohet i pafajshëm derisa fajësia e tij të provohet me vendim të formës së prerë të gjykatës.
