Presidentja e Sllovenisë, Natasha Pirc Musar, është përfshirë në një aksident rrugor gjatë kthimit nga Kroacia, ku ka pësuar lëndime të lehta trupore.
Sipas njoftimit nga Zyra e Presidentes, aksidenti ndodhi në tunelin Kastelec, ndërsa pas përplasjes Pirc Musar u transportua në Spitalin e Përgjithshëm të Izolës, ku qëndroi nën vëzhgim mjekësor.
Ajo u lirua sot dhe do të vazhdojë rikuperimin në shtëpi, shkruan N1.
Aksidenti ndodhi gjatë kthimit nga Republika e Kroacisë, ku presidentja sllovene po kalonte pushimet vjetore.
Pas aksidentit, tuneli Kastelec u mbyll përkohësisht për qarkullim për shkak të ndërhyrjeve emergjente dhe hetimeve në vendngjarje. Trafiku u rikthye normalisht në orën 20:19.
Hetimet për shkaqet e aksidentit vijojnë.
