Policia e Kosovës ka njoftuar qytetarët kosovarë se, sipas informacioneve zyrtare nga autoritetet e Maqedonisë së Veriut, ka filluar monitorimi i komunikacionit rrugor përmes mekanizmit elektronik të quajtur “Qyteti i sigurt”.
Sipas njoftimit, për automjetet me targa të huaja, përfshirë edhe ato nga Kosova, në rast të kryerjes së shkeljeve të evidentuara nga ky sistem, parashihet njoftim gjatë hyrjes ose daljes nga Maqedonia e Veriut.
“Të drejtën për pagesën e 50 për qind të gjobës brenda afatit prej tetë ditësh e gëzojnë edhe qytetarët e huaj, ndërsa në rast mospajtimi me shkeljen ose mosrealizimit të pagesës, iniciohet procedurë kundërvajtëse për të huaj para gjykatës kompetente”, thuhet në njoftim.
Përmes sistemit “Qyteti i sigurt” do të evidentohen shkelje si tejkalimi i shpejtësisë së lejuar, kalimi në semafor të kuq, ndalimi dhe parkimi i parregullt, si dhe qarkullimi me automjete të paregjistruara.
Monitorimi realizohet përmes pajisjeve teknike dhe kamerave inteligjente, të cilat evidentojnë automatikisht shkeljet e rregullave të trafikut, në përputhje me legjislacionin e Maqedonisë së Veriut.
Në fazën e parë, ky sistem do të zbatohet në qytetet Shkup, Tetovë dhe Kumanovë, si dhe përgjatë Korridorit 8 dhe Korridorit 10.
