Një motoçiklist ka mbetur i vdekur si pasojë e një aksidenti mes veturës dhe motoçikletës në pasditen e së premtes në rrugën “Edmond Hoxha” në Prishtinë.
Lajmin për tëvë1.info e ka konfirmuar zëdhënësi i policisë për rajonin e Prishtinës, Enis Pllana i cili tha se ekipet e mjekëve emergjent në vendin e ngjarjes kanë konstatuar vdekjen e viktimës.
“Rreth orës 17:00, kemi pranuar informatën se në rrugën “Edmond Hoxha” në Prishtinë, ka ndodhur një aksident trafiku me pasoja fatale. Në aksident janë përfshirë një veturë dhe një motoçikletë. Si pasojë e aksidentit, drejtuesi i motoçikletës, ka humbur jetën. Ekipet e mjekëve emergjent në vendin e ngjarjes kanë konstatuar, se viktima, mashkull, është pa shenja jete. Njësia e Trafikut ka dalë në vendin e ngjarjes dhe ka nisur një hetim lidhur me rrethanat e këtij aksidenti”, ka deklaruar Pllana.
E lidhur me këtë, është arrestuar i dyshuari shqiptar – shtetas i Gjermanisë, pasi që i njëjti duke drejtuar veturën ka shkaktuar aksidentin duke goditur motoçikletën.
Sipas raportit të policisë, me vendim të prokurorit trupi i pajetë është dërguar në IML për obduksion.
“Rr. Edmond Hoxha, Prishtinë 01.08.2025-16:58. Është arrestuar i dyshuari shqiptar-shtetas i Gjermanisë, pasi që i njëjti derisa ishte duke drejtuar veturën ka shkaktuar aksidentin duke goditur motoçikletën të cilën ishte duke e drejtuar viktima mashkull kosovar, i cili ka ndërruar jetë në vendin e ngjarjes. Me vendim të prokurorit trupi i pa jetë është dërguar në IML për obduksion, ndërsa i dyshuari është dërguar në mbajtje”, thuhet në raportin ditor./teve1.info/
