Pas pesë vitesh zbatim, Programi për Menaxhimin e Qëndrueshëm të Pyjeve në Kosovë, i mbështetur nga Zyra e Bashkimit Evropian dhe ambasada e Suedisë në Kosovë është përmbyllur sot me sukses.
Në ceremoninë përmbyllëse, kryesuesja e Zyrës së Bashkimit Evropian në Kosovë, Eva Palatova tha se programi ka pasur fokus të veçantë në forcimin e qeverisjes së pyjeve, mbrojtjen e këtij burimi dhe menaxhimin e qëndrueshëm të tij.
Palatova tha se ky program synon një ekonomi të qëndrueshme dhe neutrale ndaj klimës deri në vitin 2050, duke siguruar që ekosistemet të restaurohen.
“Programi u fokusua në përmirësimin e qeverisjes së pyjeve, mbrojtjen e këtij burimi, mundësimin e menaxhimit të qëndrueshëm dhe me shumë qëllime të pyjeve dhe forcimin e sundimit të ligjit në pyje… Strategjia e Bashkimit Evropian për Pyjet 2030 njeh rolin thelbësor të pyjeve, kontributet e pylltarëve dhe zinxhirin e vlerave të bazuara në pyje. Synon një ekonomi të qëndrueshme dhe neutrale ndaj klimës deri në vitin 2050, duke siguruar që ekosistemet të restaurohen, të jenë rezistente dhe të mbrojtura. Ligji i ri për pyjet, i mbështetur nga projekti, krijoi një bazë ligjore për menaxhimin e qëndrueshëm të pyjeve dhe mbrojtjen e biodiversitetit. Legjislacioni i rëndësishëm dytësor duhet të miratohet sa më shpejt të jetë e mundur për të siguruar që tre funksionet themelore të pyjeve të ruhen: ekonomike, ekologjike dhe sociale”, tha Palatova.
Ndërkaq, ambasadori i Suedisë në Kosovë, Jonas Westerlund theksoi se programi ka pasur për synim forcimin e institucioneve dhe zbatimin praktik të politikave pyjore.
“Ky program kishte për qëllim të forconte institucionet dhe qeveritë, si dhe të mbështeste praktikat moderne të pylltarisë që kthejnë politikat në zbatim. Qëllimi ishte mjaft i thjeshtë: një sektor i mirëplanifikuar, i bazuar në të dhëna, transparent dhe i aftë të mbrojë dhe përdorë pyjet në mënyrë të qëndrueshme. Ligji i ri për pyjet dhe legjislacioni dytësor u formuluan dhe mbështetën me trajnime për stafin e KFA-së mbi çështjet ligjore të pyjeve. Së dyti, Sistemi i Informacionit për Pyjet e Kosovës u rishikua, u rilançua në Qendrën e të Dhënave të Qeverisë.. Metodologjia për Inventarin Kombëtar të Pyjeve u avancua. Dhe përfundimisht, Qendra e Trajnimit të Pylltarisë ne Blinajë u bë operacionale, u zhvillua një fushatë e rastësishme për shpërndarjen, dhe Kampi i Pyjeve 2024 mblodhi mbi 200 pjesëmarrës”, tha ai.
Ministri në detyrë i Bujqësisë dhe Pylltarisë, Imri Demelezi vlerësoi projektin si shembull të bashkëpunimit ndërkombëtar në shërbim të zhvillimit të qëndrueshëm.
“Ky projekt i financuar nga BE, Suedia dhe FAO, në bashkëpunim me institucionet tona, përfaqëson një shembull të suksesshëm të një bashkëpunimi ndërkombëtarë, në funksion të menaxhimit të qëndrueshëm të pyje të burimeve pyjore dhe përmirësimin e jetesës në zonat rurale. Përmes këtij programi ka kontribuar në planifikimin shumë zhvillimor të pyjeve, sistemit informativ pyjor”, shtoi Demelezi.
Ushtruesi i detyrës së kryeshefit ekzekutiv të Agjencisë Pyjore të Kosovës, Mendres Ibra theksoi rëndësinë e trajnimeve dhe kapaciteteve të ndërtuara gjatë projektit.
“Trajnimet janë me të vërtetë një numër i madh i tyre. Trajnimet të cilat kanë pasur të bëjnë me mbrojtjen e pyjeve nga prerjet ilegale, integrimin e aspekteve gjinore. Përdorimin e sistemit të informacionit për pyjet e Kosovës, menaxhimin e qëndrueshëm. Është një aktivitet shumë i rëndësishëm dhe të cilin ne synojmë ta bëjmë tradicional, një aktivitet ku mblidhen të gjithë akterët e pylltarisë. Hapja e qendrës multifunksionale në Blinajë, një angazhim i rëndësishëm i projektit dhe punësimi i 13 ekspertëve të rinj”, theksoi Ibra.
Në fund, kryesori teknik i Organizatës së Ushqimit dhe Bujqësisë FAO, Ekrem Yazigi u shpreh i kënaqur me bashkëpunimin dhe rezultatet e arritura.
“Nga ana teknike, ne jemi shumë të kënaqur që mund të mbështesim zhvillimin e sektorit të pyjeve. Ne jemi shumë mirënjohës ndaj donatorëve tanë për kontributin e tyre dhe shpresojmë të punojmë me ta. Po ashtu, dua të falënderoj palët tona kombëtare për përkushtimin, kontributin dhe mirëkuptimin gjatë këtij periudhe. Edhe njëherë, nga ana teknike, jemi gati të vazhdojmë të punojmë me ju dhe dua t’ju falënderoj të gjithëve, duke ju uruar një fillim shumë të suksesshëm”, tha Yazigi.
