Mëngjesin e sotëm Indiana Pacers arriti një fitore të rëndësishme ndaj New York Knicks në ndeshjen e katërt të finales së Konferencës Lindore të Ligës NBA.
Me këtë triumf, me rezultatin 130-121, Pacers e avancuan në serinë prej 3-1.
Ky rezultat i afron Pacers një hap më shumë drejt finales së NBA-së për herë të parë që nga viti 2000.
Në një ndeshje me ritëm të lartë, Pacers dominuan që nga fillimi, duke përfituar nga një paraqitje e shkëlqyer e Tyrese Haliburton, i cili regjistroi shifrat magjike “triple-double” me 32 pikë, 15 asistime dhe 12 kërcime, pa asnjë humbje topi.
Ai u mbështet nga Pascal Siakam, i cili shënoi 30 pikë, dhe nga kontribues të tjerë si Obi Toppin dhe Aaron Nesmith.
Nga ana tjetër, Knicks u përpoqën të ktheheshin në lojë me një paraqitje të mirë të Jalen Brunson, i cili shënoi 31 pikë, dhe Karl-Anthony Towns, i cili shtoi 24 të tjera dhe 12 kërcime.
Nëse skuadra nga Indiana arrin të fitoj edhe një ndeshje tjetër, ata do të sigurojnë kalimin në finale, duke sfiduar një nga ekipet e Konferencës Perëndimore, ku me shumë gjasë do të përballen me Oklahoma City Thunder.
