Partia e kancelarit gjerman Friedrich Merz, CDU-ja e qendrës së djathtë, ka pësuar humbje të thellë në dy zgjedhje rajonale të zhvilluara të dielën në Gjermani.
Sipas exit poll-it të transmetuesit publik ARD, CDU-ja pritet të marrë vetëm 5.5% të votave në Mecklenburg-Pomeraninë Perëndimore. Ky do të ishte rezultati më i dobët i partisë në këtë land që nga përfundimi i Luftës së Dytë Botërore.
Në Berlin, CDU-ja pritet të renditet e dyta me 20% të votave, pas Partisë së Majtë, e cila sipas projeksioneve ka marrë 24.5%.
Ndërkohë, AfD-ja ka shënuar rritje të ndjeshme në zgjedhjet e së dielës.
Rezultatet vijnë vetëm dy javë pasi AfD-ja ishte shumë pranë shumicës absolute në landin lindor të Saksonisë-Anhalt, duke shënuar rezultatin më të mirë të saj deri tani në një garë për të formuar një qeveri rajonale.
Merz, 70 vjeç, mori drejtimin e Gjermanisë 16 muaj më parë, duke premtuar ringjalljen e ekonomisë së vendit, e cila prej vitesh ka qenë në vështirësi.
Pas publikimit të exit poll-eve, Merz deklaroi se synon të vazhdojë të jetë kryetar i CDU-së dhe kancelar deri në përfundim të mandatit.
“Reformat duhet të vijnë. Po e marr këtë përgjegjësi sepse dua ta çoj vendin tonë përpara”, tha Merz.
