Mesfushori i Chelseat, Cole Palmer e ka fituar çmimin e futbollistit më të mirë për muajin prill në Premier League, ka njoftuar të premten skuadra e Chelseat.
Palmer shënoi shtatë gola në katër ndeshje dhe gjithashtu bëri një asistim në muajin prill. Ish-mesfushori i Manchester Cityt, Palmer shënoi tre gola në fitoren 4:3 kundër Manchester Unitedit dhe shënoi katër të tjerë kundër Evertonit në fitoren 6:0.
Palmer është bërë lojtari i parë i Chelseat që e ka fituar çmimin e lojtarit më të mirë të muajit në Premier League që nga viti 2018. Futbollisti i fundit që e kishte fituar është belgu Eden Hazard që tashmë është pensionuar.
Në garë për këtë çmim ishin edhe Bruno Fernandes, Josko Gvardiol, Kai Havertz, Jean-Phillipe Mateta dhe Jordan Pickford.
22-vjeçari këtë edicion me fanellën e Chelseat është duke treguar paraqitje të mira. Ai në 45 ndeshje të zhvilluara këtë edicion ka shënuar 26 gola dhe ka kontribuar me 13 asistime.
