Shefi i Grupit Parlamentar të Lidhjes Demokratike të Kosovës, Arben Gashi, ka deklaruar se ata presin që sot Komisioni për Ekonomi, të jap pëlqimin që në një seancë të Kuvendit të votohet për shkarkimin e këtij bordi.
Sipas tij, bordi i ZRrE-së duhet të shkarkohet për shkak të mungesës së saktësisë në menaxhimin e krizës së energjisë elektrike, raporton teve1.info
“Ky bord duhet të shkarkohet për shkak të mungesës së saktësisë në menaxhimin e krizës së energjisë elektrike, kjo për shkak të lajthitjes së një besimi të dhënë nga Kuvendi, pasi Kuvendi i ka zgjedhur ata”, deklaroi Gashi.
“Zyra e Rregullatorit të Energjisë me procesin për caktimin e tarifave të reja ka qitur në lajthitje institucionet e vendi”, ka thënë Gashi.
Edhe shefi i Grupit Parlamentar të Partisë Demokratike të Kosovës, Abelard Tahiri, ka thënë se kanë arritur që të pezullojnë vendimin e Zyrës së Rregullatorit të Energjisë për rritjen e çmimit të energjisë elektike.
“Ju e dini se PDK ka pasë një angazhim të madh që të pezullohet tarifimi me tarifa të shtrenjta, këtë e kemi arritur javën e kaluar kur Apeli e ka marrë një vendim që është në favor me neve, ky është një lajm jashtëzakonisht i mirë”, deklaroi Tahiri.
Sipas tij, është shqetësuese se si ka lajme që KESCO ka paqartësi për tarifimin e energjisë.
“Ajo çfarë është shqetësuese është se lexojmë lajme se është se KESCO ka paqartësi për tarifimin e energjisë, pas vendimit të Gjykatës së Apelit. Këtu, ZRrE-ja duhet ta ndalë çfarëdo tendence që duket që ka të qartë që të mos respektohet ky vendim”, tha Tahiri.
Ndryshe, të enjten do të mbahet seancë në Kuvendin e Kosovës.
