Oda Ekonomike e Kosovës ka dënuar ndalimin e qytetarëve, e cila ka kërkuar respektimin e lirisë së lëvizjes për qytetarët.
OEK thotë që ndalimi i qytetarëve nga Kosova në kufirin mes Serbisë e Kroacisë, nga ana e autoriteteve të Serbisë është veprim i papranueshëm dhe i dëmshëm.
“Ndalimi i qytetarëve nga Kosova në kufirin mes Serbisë e Kroacisë, nga ana e autoriteteve të Serbisë është veprim i papranueshëm, i dëmshëm dhe në kundërshtim me frymën e bashkëpunimit e integrimit që promovon Kosova por edhe në kundërshtim me vlerat dhe parimet e BE-së që e synon tërë rajoni”, thuhet në komunikatën e OEK-së.
Ndryshe, OEK u ka apeluar të gjithëve që të marrin masa që të mos pengohet lëvizja e lirë mes shteteve të Ballkanit Perëndimorë , dhe kërkon që qytetarët dhe bizneset e Kosovës të trajtohen të barabartë me gjithë të tjerët.
Tutje, OEK u ka kërkuar institucioneve ndërkombëtare që të marrin hapa konkret në respektimin e parimeve të Procesit të Berlinit nga të gjitha vendet e Ballkanit Perëndimor.
“Deri sa e mirëpresim reagimin e instancave vendore e ndërkombëtar, u bëjmë apel, veçanërisht institucioneve të BE-së, që të marrin hapa konkretë që hapat e integrimit të rajonit, si parime të Procesit të Berlinit dhe parakusht për anëtarësimin në BE, të respektohen nga të gjitha vendet e Ballkanit Perëndimor”, thuhet në komunikatë./teve1.info/
