Eksperti i Institutit të Psikiatrisë Forenzike, Bujar Obertinca ka dëshmuar lidhur me ekzaminimin mendor të Granit Plavës, i akuzuar për vrasjen e Liridona Ademajt.
Obërtinca ka konstatuar se Plava gëzon shëndet të plotë mendor dhe se veprimet e tij nuk janë të ndikuara nga ndonjë proces patologjik apo psikik.
“E tërë kjo do të thotë se i njëjti gëzon shëndet të plotë mental për veprimet e tij nuk kanë qenë te ndikuara nga ndonjë proces patologjik, psikik”, ka thënë ai.
Obërtinca ka shtuar se gjatë ekzaminimit të kryer, i akuzuari nuk ka pasur simptoma të abstraksionit apo ndonjë ndërprerjeje të abuzimit me substanca narkotike.
“Gjatë vleresimit psikiatrit, i ekzaminuari ka deklaruar se është përdorues u substancave narkotike, si kokaina, alkooli. Por në kohen e ekzaminimit nuk ka pasur simptoma abstrenciale apo ndërprerje së abuzimit me substanca, ndërsa sa i përket traumës, i njëjti nuk është identifikuar një fenomen i tillë”, ka theksuar Obërtinca.
Ndërkaq, në përgjigje të një pyetjeje të avokatit të Plavës, Skender Gojani, lidhur me afatin prej 15 ditësh për ekzaminimin, Obërtinca ka thënë se kjo periudhë ka qenë e mjaftueshme.
“Po kjo periudhë ka qenë e mjaftueshme për vlerësim dhe është periudhë e paraparë me ligj. Ekipi vlerësues, komisioni vlerësues nuk ka pasur nevojë për kohë shtesë, përndryshe do të kishim kërkuar”, ka thënë ai.
Ndryshe, në Gjykatën Themelore në Prishtinë, këtë të hënë po mbahet seanca e radhës ndaj Naim Murselit, Kushtrim Kokallës dhe Granit Plavës të akuzuar për rastin e vrasjes së Liridona Ademajt më 29 nëntor 2023.
Në këtë seancë, po dëgjohet grupi i ekspertëve të psikiatrisë: Shpend Haxhibeqiri, Ajet Bunjaku, Blerina Hoxha dhe Bujar Obërtinca.
