Drita e ka mundësinë e mirë të luaj për herë të parë në fazën e grupeve të një gare evropiane, kur do të paraqitet javën e ardhshme, në Play-Off të Ligës së Konferencës.
Gjilanasit që u eliminuan nga Europa League të enjten mbrëma, pas humbjes nga FCSB, me rezultat të përgjithshëm, 3:6, tani do të luajnë në Play-Off të Conference League, kundër rivalit që e kishte edhe në kualifikime të Ligës së Kampionëve, Differdange.
Kundër kampionit të Luksemburgut, skuadra e Zekirija Ramadanit, do të paraqitet të enjten e ardhshme, më 21 gusht, në duelin e parë që luhet në stadiumin “Fadil Vokrri”, në Prishtinë.
Për këtë duel, UEFA-ja të premten ka zbuluar edhe gjyqtarët që do të ndajnë drejtësinë. Gjyqtari kryesor, me ndihmësit dhe gjyqtarin e katërt janë të gjithë nga Suedia, derisa ata në VAR dhe AVAR nga Polonia.
Gjyqtari kryesor është Mohammed Al-Hakim, i cili ka lindur në Irak, por si 8-vjeçar ka emigruar me familje në Suedi.
Ndihmësit e tij janë Mehmet Culum dhe Fredik Klyver, ndërsa gjyqtari i katërt është Granit Maqedonci.
I lindur në Prishtinë, duke emigruar me familje kur ishte vetëm 3-vjeçar, Maqedonci tani 36-vjeçar, është gjyqtar profesionist në Suedi, që nga viti 2016.
Në këtë edicion ai ka ndarë drejtësinë në dy ndeshje ndërkombëtare, të garave të UEFA-së (Europa League dhe Conference League), derisa është gjyqtar ndërkombëtar që nga viti i kaluar.
